Habari Kitaifa

Waziri Mhagama Akagua Maandalizi ya Sherehe za Mei Mosi Mkoani Iringa

on

Waziri wa Nchi Ofisi anayeshughulikia masuala ya Sera, Bunge, Vijana, Ajira na Watu wenye Ulemavu Mhe. Jenista Mhagama amekagua maandalizi ya Sherehe za Mei Mosi na kusema ameridhishwa na hatua zilizofikiwa.

Ametoa kauli hiyo Aprili 14, 2018 baada ya kupokea taarifa ya Kamati ya Maandalizi katika Ofisi za Mkuu wa Mkoa wa Iringa.

Waziri amesema Kamati ya Mkoa imefanya vizuri hatua iliyomfanya kuridhishwa na maandalizi hayo.

“Nitoe pongezi kwa hatua hizi za awali mlizoanza nazo ikiwemo Kuunda kamati hii ya kuratibu shughuli zote ili kuhakikisha sherehe hizi zinafana na kuvunja rekodi.”Alisema Waziri Mhagama.

Waziri Mhagama aliwataka wanakamati hao wahakikishe wanasimamia vizuri wageni, pamoja na wananchi watakaojitokeza kwa kuzingatia jiografia ya Viwanja vya Samora.

“Niwaombe mzingatie namna bora ya kuwaratibu wageni watakaohudhuria, na kuangalia namna ya kuwapanga wananchi kwa kuzingatia uwanja huu umezungukwa na wakazi wengi hivyo tunatarajia ugeni mkubwa.”Alisisitiza Waziri.

Sambamba na aliwaomba waendelee kuhabarisha umma ili Wananchi wafike kwa wingi ikiwemo Wajasiliamali wadogo ili kupata fursa ya kujitangaza na kuonesha namna mkoa unavyozalisha na kuchangia katika uchumi wa viwanda.

Aidha kwa Upande wake Mkuu wa Mkoa wa Iringa Mhe. Amina Masenza aliahidi kusimamia vyema maandalizi na shughuli zote kwa ufanisi na kuzingatia maelekezo yote yaliyotolewa.

“Ninaahidi kusimamia vyema yote uliyoelekeza na kutekeleza kwa ufanisi, na tunakupongeza kwa kutembelea kuangalia namna tunavyoendelea na maandalizi, nikuhakikishie tumejipanga kama Askari vitani, wakati wote tu tayari.”Alisisitiza Mhe. Masenza

Maadhimisho ya Sherehe za Mei Mosi yatahadhimishwa Kitaifa katika Mkoa wa Iringa ambapo Mgeni Rasmi anatarajiwa kuwa Mhe.Rais wa Jamhuri ya Muungano wa Tanzania Dkt.John Pombe Magufuli, aidha maonesho hayo yatapambwa na shughuli mbalimbali ikiwemo; Kwaya maalum, Nyimbo maalum kutoka kwa Vyama vya Wafanyakazi, maonesho ya wajasiliamali, wimbo maalum kutoka kwa wasanii wa kizazi kipya, vikundi vya ngoma kutoka mikoa mbalimbali, Nyimbo maalum kutoka Jeshi la Kujenga Taifa (JKT).

About Habari360_TZA

Recommended for you

Leave a Reply

Your email address will not be published. Required fields are marked *